貿發局出咗最新嘅年報，話晒係蘇澤光（JackSo）上任貿發局主席後首份年報，華華梗係要昅昅，JackSo話，要繼續發展推廣香港嘅採購同商務服務平台，吸引全球中小企使用，佢仲提到貿易展覽每年為香港帶嚟264億銀經濟收益，咪話唔犀利。JackSo做貿發局主席係義務性質，冇人工，但以佢今時今日嘅身家，都唔志在。
至於總裁林天福，舊年𢭃咗602.2萬銀人工，比上一年度570萬，加咗5.6%，同係半官方機構，大家title都係總裁，但林天福同金管局總裁任志剛、港交所（388）行政總裁周文耀相比，可以話同係總裁唔同命喇，任總同周文耀舊年底人工分別達1033.7萬同1518.2萬銀，簡直蚊髀同牛髀。