自從Twins傳出拆夥，蔡卓妍（阿Sa）噚日首次現身，佢出席沙田馬場活動，同場仲有成龍、容祖兒、謝霆鋒同黃耀明等。對於拆夥一事，阿Sa話：「又傳，我都係睇報道先知，公司都否認咗。」咁幾時先同鍾欣桐（阿嬌）一齊出現？阿Sa話：「我同阿嬌想法一致，𠵱家唔係最好嘅時候同大家見面，等各自吸收吓新嘢先。」
祖兒咒自己
同場的容祖兒好受外籍騎師歡迎，佢講笑話：「外國人眼中扁口扁面好有中國味，我會叫經理人安排我去外國發展。」佢又話嚟緊會去美加巡迴演出，仲會主力搵歸宿，問祖兒係咪想學陳慧琳咁喺個唱宣佈婚訊？祖兒竟然咒自己話：「可能我會喺第一場宣佈結婚，第二場就話離婚。」
此外，記者問霆鋒，佢個老婆張栢芝好似瘦咗好多，佢話唔覺，仲爆栢芝成日話自己肥。對於細妹婷婷話入娛圈，霆鋒都係嗰句話唔贊成，至於又話婷婷一腳踏兩船，霆鋒話佢過問唔到，馮仁昭話佢冇阿哥威嚴？霆鋒笑住話：「我連佢話入行都唔知，威條毛咩！」
另外，祖兒同成龍等人噚日上晝出席喺紅館舉行嘅「慶祝香港特別行政區成立十一周年大會」，對於傳同佢面左左嘅曾志偉得到政府頒榮譽勳章，祖兒話：「係咩！哦！恭喜晒，戥佢開心。」