出晒名寧裸體都唔肯着皮草嘅善待動物組織，又喺度玩嘢。相信大家都仲懷念緊動植物公園嘅美洲老虎乸小花，佢喺孤寂嘅環境下結束咗欷歔嘅一生。康樂及文化事務署為免被愛護動物意識日漸高漲嘅香港人批評，唔敢再引入美洲虎。
康文署都唔多想提起呢件喪事，點知善待動物組織就嫌康文署被人插得少，噚日美洲虎上身撲出來，話要嘉許康文署嘅憐憫之心，話多得康文署嘅介入，動植物公園先放棄搵多隻美洲虎來香港替死。善待動物組織既然係要玩曲線玩得咁盡，不如頒多張嘉許狀過海洋公園，表揚吓佢哋及時喺海洋館中救出四條未被海狼咬親嘅國寶中華鱘，呢條曲線仲曲過習近平出手救煲呔嗰條。