黃貫中（Paul）與朱茵拍拖接近9年，順利過渡7年之癢，不少朋友也希望他們早日拉埋天窗，前晚阿Paul與朱茵公開打情罵俏，許下承諾非卿不娶，令朱茵即時冧爆，坦言非君不嫁，甘願做阿Paul背後的小女人。
前晚在九展STARHALL舉行的「Let'sFightLiveRoundIII」，演出的有黃貫中、葉世榮、范曉萱、何超儀、林曉培、24味、Soler及林海峰等，而捧場的有徐濠縈與康堤、吳彥祖、谷德昭、劉浩龍、鄭融及黃泆潼等。
「最有安全感」
阿Paul與女友朱茵在慶功宴上更大晒恩愛，阿Paul又許下承諾誓娶朱茵為妻，被阿Paul冧爆的朱茵，在男友身旁如小鳥依人般，被問及婚期時二人更不忘打情罵俏，阿Paul說：「嫁畀rock友好危險㗎，不過我娶硬佢，唔好同我爭呀，唔係死梗，婚期到時會公佈。」朱茵則甜笑說：「我唔覺得佢係危險人物，佢係我遇到嘅人中最有安全感嘅一個，嫁就未係時候，不過都非佢不嫁。」
記者笑阿Paul發出愛的宣言，朱茵說：「我對佢非常有信心，不過啲肉麻說話唔好公開講，一旦公開承諾冇得後悔，佢咁樣講令我好尷尬，不過又幾冧嘅，但係驚冧冧吓變咗好行喎，拍戲都拍得多啦！呢啲人生大事要低調好啲，唔好成日暴露喺人前。」
唱粗口歌起哄
此外，前晚的演唱會反應熱烈，每一位歌手出台表演也有歡呼聲，由林海峰與阿Paul打頭陣揭序幕，其中24味大唱粗口歌，令台下觀眾也跟着起哄，而林曉培因去年6月在台灣醉駕撞死人後，首度來港演出，台下觀眾也對她十分支持，她在台上說：「只要堅持便有機會，把握機會便成功。」不過其後她以失聲為由，未有出席慶功宴。另一位台灣歌手范曉萱與男友同台演出，在慶功宴上范曉萱表示，在台灣已見過林曉培，她的心情還好，大家應該鼓勵她站起來。
何超儀為防走光，刻意在一件神奇女俠裝下再加穿一件肉色衫打底，她事後說：「幾乎跳到跌咗粒星出嚟，因為好辛苦先買咗螢光乳貼，着兩件衫喺台上熱到嘔，搞到胃抽筋，好high呀。」
採訪：駱華齡
攝影：黃偉雄
