相信唔少市民今日7.1都會去維園，用行動話畀煲呔知，唔滿意佢嘅施政，兼要求盡快普選。油價飛升通脹高企，今年嘅訴求自然包括民生議題，呢排民望插水嘅煲呔噚日巡完油站又去超市格價，仲承諾會就通脹同油價做嘢，似乎想喺7.1前夕曲線叫大家唔好上街。點知佢為咗做好呢場騷，居然連誠哥都插埋一份，話百佳啲嘢賣得貴喎。
話說煲呔喺攞命陳陪同下，噚日晏晝踩落唔少基層市民居住嘅深水埗區，先去油站視察，其間仲烏低身同的士司機討論吓油價問題，好似好親民咁。之後佢就去到美孚，親臨誠哥旗下嘅百佳，聽消委會嘅代表講解自從佢哋四出格價後，有款椰汁價格差距收窄咗，煲呔就話唔應該人為咁大幅提價。咁仲不特止，煲呔跟住去到間新鮮糧食店，好天真好儍咁發現嗰度同款椰汁賣平過超市好多，問人哋啲夥計，點解啲椰汁可以賣得咁平？
人哋阿姐尷尷尬尬咁答佢話，大批買入咪平囉。煲呔仲鍥而不捨咁追問，咁超市唔係仲大批買入㗎咩。煲呔咁講法，即係寸誠哥屬下超市啲嘢賣得貴啦，之後佢仲振振有詞咁話，會協助市民對抗通脹，又讚消委會嘅格價行動對「穩定」超市價格有用，應承會同消委會合作，維持同推廣呢項服務。
希望司機大佬息怒
插完誠哥，煲呔又向司機埋手，話政府留意到油價上漲對運輸業界嘅影響，承諾會研究增加油價及油公司定價程序嘅透明度，確保市場開放同供應充足，仲話會諗諗有乜計仔令石油零售價格有調節空間。擺明就想班運輸業大佬息怒，千祈唔好堵塞完中環又去維園遊行。
煲呔又主動「放料」話，10月發表施政報告前，會研究對民生特別有影響嘅問題。換言之，佢預告施政報告會重點出擊對付通脹，唔知包唔包埋對付啲壟斷市場兼謀取厚利嘅超市呢？
不過，翻查歷史，煲呔作過嘅承諾唔少都係空頭支票，普選問題就係最明顯嘅例子，至今都冇人話到畀大家聽2017年係咪有真普選，加上佢噚日話就話要解決要研究，但都係冇實質措施，信佢實在冇乜揸拿，都係用自己對腳提出訴求先最實際。
mailto:[email protected]