【巴黎直擊】余文樂和黃偉文（Wyman）前晚以黑白雙煞在巴黎看騷，他倆孖咇花都時裝行，余文樂笑言是同吃同買，不過分開「方便」，孖咇男更互push對方買衫大出血，余文樂就半個鐘頭買了5條裙。
余文樂和黃偉文日前赴法國看男裝騷，香港時間前晚他們一黑一白在巴黎熱捧DiorHomme09春夏男裝，與「老佛爺」KarlLagerfeld同場。余文樂透露原定開拍的內地導演新片延期，故可以飛英國安頓在倫敦升學的妹妹，再飛往巴黎會合Wyman。
帶錯冬裝
連場睇騷，問余文樂感覺如何？他說：「走難就梗啦，不過唔辛苦，因為我根本好鍾意時裝，又好enjoy，同埋點都辛苦唔過拍戲啦。」他直認跟Wyman連日來行孖咇看騷吃飯，他笑說：「一齊食飯、一齊買衫，不過就分開屙。」由於他錯帶一篋冬天衫，所以要在巴黎置裝順道掃新貨，孖咇兄弟更掃貨掃到癲晒，余文樂說：「大家攬住大家一齊去死，猛推對方買嘢，我半個鐘頭內買咗五條CommedesGarcons嘅裙，不過我都冇乜傷（指荷包），佢就傷得多啲。」
四周園景
Wyman則指看了多場騷，最愛DiorHomme及Givenchy，今次是KrisVanAssche上任的第二季DiorHomme作品，問Wyman對他與前任HeidiSlimane的分別？Wyman說：「我自己都已經成日俾人拎嚟比較，更加唔會將人哋兩個人比較。」
DiorHomme前晚在巴黎第14區的天文台花園舉行，模特兒在園林實景中步出，黑白基本外，今季也多了如電子藍、鮮黃、螢光粉紅等sharp色鬆身jacket，下身就仍是廸奧男的招牌窄褲。
採訪：梁錦貞
攝影：林德雄
