蘋果批Online
Click入http://pie.appledaily.com收看
歡迎透過web-cam即時發表意見
或致電29908648安排親身上場
電郵：mailto:[email protected]
網誌：http://pieatapple.wordpress.com
每年七一遊行，我哋會睇到不同嘅訴求，但始終都離不開爭取民主普選這個主旋律，因為目前香港嘅畸形政治生態，正正係欠缺民主所促成……主持：楊卓華、高明輝
好似最近嘅副局長風波，就係畸形政治催生嘅「大內總管」一手促成。事實上，睇番歷史，「大內總管」往往將事情越搞越禍。前有董建華嘅路祥安，後有今日嘅陳德霖。
正如昨日《蘋果批》討論過，目前非民主嘅政府，推政策往往需要同各政黨進行政治交易，一位能夠游走於各司局之間，以及「理順」民間輿論嘅特首辦「大內總管」於是應運而生。「大內總管」權責不清，官拜只係四、五品，但權力隨時大過一品六部尚書﹔加上以「做deal」為大前提，少去考慮基本政治理念，以為一切都可以靠「政治化妝」解決，結果就係越化越衰。
政府沉迷「政治化妝」，亦係畸形政治生態之下嘅怪現象﹔當人民唔可以直接透過選票表達佢哋認同嘅政治理念，民意就只能透過傳媒再加上形形色色嘅民調，間接表達出來，於是政府就淨係掛住「政治化妝」理順傳媒，唔去考慮政策本身係咪違反基本政治理念。
獅子山學會創辦人李兆富
官僚以權力為依歸，所以我哋會發覺由回歸至今，大多數最具爭議嘅係講究竟我哋需唔需要賦予官員多啲權去處理某啲事情，立法會所有人都被「賦唔賦權」呢個議題牽制；最大問題係立法會議員係冇提案權嘅橡皮圖章，當你唔預期一班橡皮圖章有效地行使制衡權嘅時候，就會出現（傳媒）頭版治港嘅現象。
政府欠缺直接民選認受性，衍生出來嘅政治生態只會越來越畸形。七一遊行嘅精神，就係讓市民重申民主普選訴求，再一次向目前畸形的政治體制說：不！
