昨日回歸紀念日，內地股市並未止跌慶賀，上證綜合指數又跌3%，跌穿上月中低位，至2650點水平，至今距3000點「鐵底」已經越來越遠。個市係咁跌，股民揸住蟹貨已經唔多開心，若然揸住隻股票竟然話要供股集資，則重大劑，隨時跌得仲勁。
日前廣州廣船（317）宣佈以31億元向母公司中船收購廣州文沖船廠，並計劃改名為廣州中船國際股份，而收購所需資金，建議透過H及A股同時供股集資，每10股（H股及A股）供3股，預期在建議供股計劃下，會發行一億零一百多萬股A股及4700多萬股H股，供股價按例不能低於5.55港元或4.96元人民幣，最少集資8.2億元。
鞍鋼去年奇迹難重演
廣船H股去年10月股價曾高見68.5元，經過一輪下跌，如今股價已跌到落20元，但係供股價僅5.55元多些（估計高呢個價唔會好多），折讓仍係相當驚嚇，雖然低價供股可能吸引貪平貨投資者，但係對股價即時壓力唔細。
國企供股，最經典莫過於去年10月初，鞍鋼（347）公佈以每10股供2.2股，H股供股價為15.91港元，A股供股價15.4元人民幣，較當時股價大幅折讓47%，集資共201億元人民幣，作為收購營口港鋼鐵項目。由於去年10月港股尤其中資股炒到熱火朝天，供股反被視為好消息，公佈後股價竟可單日勁升15%。
情況一如97年紅籌國企話配股集資搞收購注資，股價唔炒到飛起至奇，但到咗98、99年，同樣配股集資，唔炒不特止，仲要插到飛起。廣船今次供股，不幸遇着環球跌市，相信都幾難重現鞍鋼去年嘅股價神勇表現。