特區政府每年7.1都會大派「荷蘭水蓋」。今年其中一位大紫荊得主係全國政協常委陳永棋嘅叔父、長江製衣創辦人陳瑞球，唔知佢算唔算「失而復得」呢？因為舊年公佈授勳名單前，發生咗一宗「洩密」事件，據講事後導致呢位紡織界元老級人馬「食詐糊」。
當時有傳媒事先張揚，報道陳瑞球、樹仁大學校長鍾期榮、行會成員陳智思嘅爸爸陳有慶有份攞大紫荊，但正式公佈時佢哋榜上無名。事後江湖傳聞，話因為授勳名單外洩搞到煲呔大怒，結果到最後一刻上述三位仁兄臨門撻Q食白果。
今年再冇名單提早外洩，而陳瑞球同鍾期榮嘅老公胡鴻烈博士都攞到大紫荊，遲就遲咗少少，但都好過冇啦。