兩個月後嘅立法會選舉直選議席僧多粥少，各路人馬都爭崩頭搶位，為爭取曝光機會，部份人趁噚日7.1遊行唔怕突兀，公然抽水宣佈參選，當中以「自然療法醫生」袁大明聲勢睇嚟最浩大，帶埋幾百人上街「助選」沿途派政綱，人人爭取普選嘅時候，佢就乘機為自己爭取選票，做法令人側目。
袁大明鼓吹嘅自然療法，好似洗腸咁，一直喺醫學界有極大爭議，佢噚日聲言每年7.1都有上街，自稱係「香港更好大行動」召集人，指呢個組織成立咗三年，向政府提過唔少施政建議。恕八方孤陋寡聞，印象中冇乜聽過佢啲「施政建議」。佢份政綱好長氣，有興趣者可睇佢個網站，至於遊行人士最關心嘅普選問題，佢喺政綱內冇多提，只係泛泛而談咁話，如果2017年冇普選，會第一個遊行。
何秀蘭傷腰骨
袁大明向八方「宣佈」出選港島區，佢明顯有備而來，印咗三萬本彩色政綱通街派，幾百人助選團又高舉橫額、紙牌，人力、物力似乎十分充裕，不過佢啲助選員好奇怪，八方問佢哋點解幫袁大明助選時，個個唔係驚惶失措就啞口無言，十足怕俾人見到嗰啲明星fans咁。
除咗袁大明，「公民起動」何秀蘭嗌咪時爆響口，叫市民捐款畀公民起動做選舉經費。其實佢再戰江湖係公開秘密，唔使再猶抱琵琶半遮面啦，噚日遊行人士都係泛民擁躉，唔趁機公告天下更待何時？不過佢話未來兩星期要暫掛免戰牌，因為腰骨有毛病行動不便，近日要靠枴杖行路，「要讓賽兩個禮拜，好番先可以正式拉票。」
其他幾個有意喺港島出選嘅人都有蒲頭，勞永樂單拖上陣，公民黨陳淑莊同黨友曾國豐、余冠威就一齊站台壯膽。公民黨三子都算係經03年7.1洗禮而矢志從政嘅政治新人類，所以7.1對佢哋特別有意義，余冠威話參選係要體現「民主接力，以身作則。」民主黨甘乃威以前遊行時好低調，噚日卻四圍走引人注意，初時企喺維園門口，後來就去到灣仔，同民主黨其他三個第二梯隊人物一齊擊鼓造勢，大家有冇留意到？
mailto:[email protected]