近年好多華資企業陸續委任第二代、第三代……入董事局，邊學邊做等接棒。最新一家就係利豐（494），宣佈委任馮國經個仔馮裕鈞做執行董事。呢個職位並冇固定服務年期，董事袍金每年8萬銀，仲有「無上限的酌情花紅及認股權」。
馮裕鈞01年已加入集團，洋名SpencerTheodoreFung，照字面解，Spencer解治理者，Theodore解上帝送嘅禮物。佢今年34歲，主管旗下全資附屬公司利豐（貿易）嘅營業部門，帶住800個員工，採購係家族生意嘅基礎，馮裕鈞就係負責制訂採購策略同經營效益，擔子一啲都唔輕，不過經過7年，相信佢嘅表現都已經得到老竇同叔父馮國綸認同，唔係都唔畀佢入集團「心戰室」啦。
06年同律師結婚
其實馮裕鈞早就得到家族兩大真傳：一係低調，06年佢同律師女友結婚時低調進行，一班傳媒到教堂採訪，佢就匿喺教堂唔見人。另一真傳係讀書叻，老竇同舅父都係哈佛仔，馮裕鈞都唔弱，係哈佛學院文學士，又係美國註冊會計師，仲攞埋東北大學會計同埋工商管理碩士。
講開新一代接班人，近一兩年，安排新一代入局嘅上市公司都唔少，電影人黃栢鳴創辦嘅東方娛樂（009），6月初先安排咗29歲嘅囝囝黃子桓做埋執董，囡囡黃漪鈞做執董更係早幾年嘅事。華置（127）大劉劉鑾雄亦安排大劉仔劉鳴煒做執董。最心急嘅應該係前中國女首富張茵，喺玖紙（2689）上市前，佢已安排大仔劉晉嵩做非執董，家陣劉晉嵩仲喺哥倫比亞大學讀工業工程碩士。
電郵：mailto:[email protected]