舊生甲：「你知唔知𠵱家上堂時間鎖大閘，唔畀走堂。」
舊生乙：「唔係啩，咁過份！」
殺校風盛，護校救校的行動很多，但師兄為師弟爭取「走堂權」，倒是第一次聽，那間學校，叫華仁書院。
「唔走過堂，點可以叫華仁仔呀！」周守仁，畢業於香港華仁、哈佛大學教育博士，年少體弱，讀書成績差，試過全班考第尾，現為港九兩間華仁的校監，能從谷底反彈，他說全因為華仁神父的包容。
華仁出名校規少，似有還無，學生奇裝異服也不摘名，缺點、記大過更是聞所未聞，「九華呢邊少啲校規，港華嗰邊仲係太多，遲啲都會建議佢哋減少啲，其實好多時同啲學生講，佢哋明就算，都唔會真係罰。」
不滿扼殺自由風氣
最近，華仁實施上課時間「關大閘」措施，有校友不滿，覺得大閘一關上，學校自由風氣也扼殺了。周守仁當年也走過堂，老師隻眼開隻眼閉，「成班人走開（堂）咪走囉，唔記得做乜喇，都係搞活動，可能出去影印。」
由學生到校監，不單角色轉變，世界也變，「唔係話𠵱家學生差過以前，係成個社會環境改變咗，以前唔會郁啲就索償，𠵱家乜嘢都講保險，如果學生走咗出街，遇到乜嘢事，保險公司都唔會賠，學校壓力大咗好多。」
周守仁承認，就連教學方法，也越來越被大環境牽制，「我哋教學生思考，唔想淨係教syllabus，唔會gothrough所有課文，而係提出啲進階問題等學生思考，等佢哋自己搵答案。」
熟悉教育理論的他一臉無奈，「𠵱家教育制度仍然重背誦同操paper，根本冇空間畀學生去理解，但係冇辦法，呢啲係公開試嘅ruleofgame，我哋都要妥協。」
看來，要捍衞那道長開的閘門，不是考驗學生的勇氣，也不是考驗師兄的感情，而是修道人的智慧。
後記：
「你知唔知呢棵係咩樹？」下雨天，記者跟在周神父身後，在九華的校園穿梭拍照，神父隨手摘下樹葉，撕開遞上，「係咪好香？係咩味嚟？」
記者一呆，沒想到有此一問，神父解窘，「係肉桂，用嚟加入嘢食入面嗰啲肉桂。」
教育果然不單在課堂內。
周守仁說，試過在大閘等人，學生認不出他，一樣自出自入，說的時候，只是笑，「呢度係大閘，仲有西閘，有啲學生會爬足球場，出口咁多，所以都好難看實，你問我𠵱家仲有冇人走堂，有，我估實有。」
三個入口，要看緊，有多難？
還是，神父啊，神父啊，其實都嘴硬心軟？
記者張嘉雯