市場傳聞，銀行界頭號好人兼做得嘅賓架──星展銀行（香港）零售銀行業務總監張耀堂，唔撈「兜巴星」（即DBS星展）嘅消息，終於獲得證實，佢哋間寶號嘅內聯網，本周一已經發出Sunny（張之洋名）辭職公佈，佢老哥將會做到8月底交棒，由荷銀大中華一姐LindaWong接掌。
華華收到探子密報，話Sunny將會加盟建銀亞洲，協助行政總裁兼首席執行官馬志文，打理成個零售銀行部，建銀亞洲即係美國銀行（亞洲）前身，俾母公司建行（939）收購後先至改名。
雖然建銀亞洲在港規模唔算好大，但資產質素優良，近期便成為繼星展後第2家宣佈加按揭息嘅銀行。不過建銀亞洲發言人就回覆華華，對於傳聞未能證實。
做訪問增銀行知名度
講番Sunny，佢係本地資深零售銀行界人才，99年加入道亨前，喺花旗工作，01年道亨被星展收購合併，一直做到𠵱家，連埋道亨歲月，屈指一算喺間銀行做咗超過10年。
星展收購道亨後冇再喺本土上市，佢老哥經常接受傳媒訪問，講解按揭息率稅貸等課題，儼如星展喺香港嘅一大icon，幫助銀行大大提升知名度。
今次佢老哥以私人理由請辭，據熟識佢嘅身邊人話，Sunny唔係提早退休，佢會再戰江湖。