IBM上個月發表咗《全球CEO調查》，結果顯示，近八成大陸CEO傾向透過收購達到企業增長，IBM全球企業諮詢服務部亞太和大中華區戰略與變革服務合夥人戴偉信，接受《中國企業家》雜誌訪問，以「大膽」嚟形容大陸嘅CEO，佢話：「企業收購經常都會失敗，當然亦有成功例子。中國CEO比其他地區嘅CEO更鍾意併購，原因係呢班CEO喺中國發展急促嘅環境下，急於達到快速發展嘅目標。」
戴偉信以聯想（992）收購IBM個人電腦為例，佢話聯想透過收購，可以短時間喺全球66個國家建立出1萬人嘅海外隊伍，對於企業發展嚟講，可以話係非常吸引。佢仲提到內地企業喺未來有兩個障礙：第一，關乎企業本身，包括喺管理架構同營運方面，能唔能夠支持企業邁向國際發展；第二，員工能力，有冇足夠經驗同人才配合企業嘅快速發展。