煲呔個副局長、政治助理名單搞到班政務官條氣好唔順，有啲新貴冇乜政治同行政經驗都攞十幾廿萬人工。政府內部近日就出咗份政務官最新排名榜，近500名政務官按職級同年資排晒出嚟，嗰班常任秘書長固然捱足二、三十年先升到𠵱家個位，就算現金人工低過政治助理嘅丙級政務官，年資都有十幾年。
馬房好重要
名單中職位最高同年資最深、喺500人排第一嘅係D姐俞宗怡。佢年紀唔係最大，但升得快，74年加入政務職系，做咗23年，97年升到D8，比第二位嘅民政事務局常秘尤曾家麗喺2002年升D8，相差六年有多。仲有，排名榜頭五位有四個係女人，除咗第四位嘅運輸及房屋局常秘何宣威外，第三同第五位分別係食物及衞生局常秘李淑儀、商務及經濟發展局常秘劉吳惠蘭。
排第11係人稱肥陳嘅陳鎮源，佢比D姐早一年加入政務官，但今年先升D8。榜上有兩個男士升得快過火箭，僅次D姐，係第九同第十位嘅教育局常秘黃鴻超同財經事務及庫務局常秘應耀康，佢哋都係做咗24年，分別喺06同07年升D8。兩個𠵱家先至40幾歲，仲可以坐多十幾年。
有資深政務官話，做官除咗本身有冇料之外，馬房都好重要，有時唔好彩跟着啲唔夾嘅上司，就好難翻生。