遊行「景點」除咗陳太、馬丁、長毛呢類人氣高企嘅政治人物外，原來電視台小花亦係「到此一遊」必備背景。八方噚日喺遊行隊伍中，見到無綫新聞小花鄭詩亭準備做live，直播街頭情況，鄭詩亭對住鏡頭報道，鏡頭後面，有一班電車男物體拎住部相機喺度狂影，原來佢哋係新聞小花fans，一班人影完又有另一班走埋嚟影，鄭詩亭唔理得咁多，報新聞要緊。
鄭詩亭近排人氣急升，事關佢月前去四川採訪地震災情時，獨家訪問到國家主席胡錦濤，當時胡總一手搶住TVB支咪講嘢，呢個鏡頭成為近日行內美談，TVB頻頻重播不在話下。鄭詩亭一舉成名，有雜誌更刊登佢嘅自拍照，甫士搞鬼又調皮，着小背心影相可觀性都頗高。