【本報訊】軒尼詩道懂得變身，每年這一天都變。
柏油路上沒有車，只有一身臭汗的人，還有桌子、橫額和大聲公，汗如雨，一直灑，澆灌灰暗的路面，裝飾着烈日當空。
我是少數族裔，但同樣是人；我討厭副局長馬房，我忍無可忍；我只是升斗巿民，怎捱過百物騰貴；我是性工作者，你太太是內地人，我是同志，你是雞販，我是業主，你是大學生，I'mmigrantworker。
7.1遊行，團體來自各行各業，遊行人士背景各式各樣；有的拿着巨型直幡，有的穿上民族服飾，有的面塗白油有編了彩辮；軒尼詩道變了，因為我們。
但你沒有因為我們變了，親愛的當權者，你沒有。
我們打鑼打鼓，我們古靈精怪，我們的苦心，是否不可能動搖你那顆鐵打的心？記者：倪清江、林社炳、李寬聲
塌山泥遺孤望保命仔
盧牡丹 咖啡灣山泥傾瀉慘劇家人
上月黑雨舊咖啡灣嚴重山泥傾瀉，一對來港探親夫婦被活埋死亡。女死者孿生胞妹盧牡丹（中）昨日與夫婿，帶同死者兩名年幼孤兒（右一及二），手持「加強勘察斜坡保障生命」橫額，首次走上街頭參加7.1大遊行。她的夫婿謝先生（左二）說：「帶埋一對孤兒上街，係想政府重視全港住喺斜坡居民條命仔。仲希望政府批准，等死者喺內地嘅孤兒可以來港居住。」
香港遊行柔性理智
程翔 《海峽時報》高級撰稿員
「除咗囚禁（年初才由內地假釋回港）嗰三年，今年係我第五次參加7.1遊行。香港市民嘅政治思想夠成熟，足以爭取雙普選。好似今日遊行，世界上好難搵到大規模遊行示威會好似香港咁，柔性、理智、秩序井然。另外，我支持陳方安生出選立法會，因為陳太熟悉香港政府運作，比較敢言，能夠帶領香港發展。」
哀悼中華鱘 關注保育
關祝文 沙田居民
「內地送咗五條國寶中華鱘畀香港，但就放喺海洋公園海洋館，同其他海洋生物雜養埋一齊，結果中華鱘五號唔到十日就俾海狼咬死，我感到好沉痛。我經常會去影沙龍嘅大埔龍尾，因為政府打算喺嗰度興建人工沙灘，三百幾種海岸生物生命危在旦夕，令我極為不滿。曾蔭權只睇北京面口，漠視港人民意。」
政府咪當我哋透明
鄭先生 藝術工作者
「其實呢個係我哋04年訂婚時候嘅背影，我哋舊年整咗做膠板嚟遊行，今年用透明膠板再做多一個。政府成日都當我哋巿民嘅意見透明，我哋嚟就係想話佢哋知我哋唔係透明，我個女𠵱家歲半喇，我哋想為下一代爭取一個好啲嘅環境，今年佢郁動多咗，我哋辛苦啲，不過都習慣，佢雖然重，但係都冇呢塊膠板咁重。」
一人一票 我想選特首
謙謙 5歲
「我今年5歲，已經係第二次跟爹哋媽咪參加7.1遊行。我支持減免油稅，唔想爹哋媽咪用咁多錢入油。平時媽媽教我㗎，希望香港可以一人一票，好似立法會選舉咁選特首。（記者正欲離去時，謙謙加大聲線補充：）我好想選特首。」
副局長應放棄護照
SmritiSafaya 印度人
「今日是第一次參加7.1遊行，因為想感受一下香港的自由。感覺很好，希望多些人來參加。我在香港出生，4歲半時搬到北京，92年才搬回香港。89年天安門事件發生時，往機場的路封鎖了，當時我只得8歲，但也感到氣氛可怕。最近我跟母親討論副局長事件，我們認為持有外國護照，不會為香港謀求最好，所以應該放棄護照。」
大隻講 衰過董建華
孫先生 78歲退休人士
「我由03年開始已經參與7.1大遊行，今年再嚟，比較關心切身嘅高齡津貼問題，生果金加300蚊都唔夠啦。嚟緊9月立法會選舉，我會支持泛民主派議員，選區議員時我都係選佢哋，不過（立法會選舉）未揀定邊個。曾蔭權施政不嬲都大隻講，仲衰過董建華。」
有冇聽過中產意見？
林先生 工程界
「每年7.1都會上街，爭取普選。民主有幾緊要唔使多講，你睇曾特首無端端用納稅人啲錢搞乜嘢副局長、政治助理，人工點解咁高？因乜事揀呢啲人，唔清唔楚，唔使交代。遲吓又話可能要供強醫金，特首有冇聽過中產意見？我一對小朋友一個3歲，一個5個月大，兩個上街都瞓着咗。帶住佢哋遊行唔辛苦，我諗唔使等到佢哋大個先有普選啩！」
毋忘奧運保障人權
關注中國人權人士
奧運五環旗昨在7.1遊行隊伍中飄揚，不過這是一面黑色的旗幟。五色彩環變成了銀色的手銬，那是無國界記者製作的旗幟，提醒公眾北京奧運舉行在即，但內地政府沒履行改善人權的諾言。手持旗幟的周小姐（右）與十多名朋友一起上街，沿途向遊行人士派發「斷指工人，支持奧運」等傳單。她們希望在奧運前夕，喚起市民關注中國的人權狀況、勞工權益。
油價升 怕老闆執笠
潘先生 旅遊巴司機
「政府減5毫6柴油稅仲未生效，油站話咁快加咗3毫8。咁樣加法，老闆同人簽晒合約，又唔可以加價補番數。我擔心老闆做蝕本生意，遲早捱唔住要執笠。我最近頻頻上街示威抗議，係因為政府愛理不理，今次係第一次參加7.1大遊行。」
曾特首忽略了貧民
社區組織協會
「反通脹、反貴租！」社區組織協會昨組織了約200名窮人上街，抗議政府「高官加薪出盡力，壓抑通脹唔盡力」。特首曾蔭權前日急急到深水埗巡區上演親民騷，但這批居於板間房、舊唐樓的低下階層，卻未獲安排向特首反映意見。他們昨高舉「尋找曾特首」的紙牌，希望曾蔭權真正走入群眾，聆聽窮人的聲音，推出真正能保障弱勢社群的政策。
有民主 才有動物權益
關注動物權益組織
「我哋多個關注動物權益嘅團體都有代表嚟參加遊行，總共150人左右。我哋認為，政府當局喺維護動物權益方面做得唔夠，例如對一啲虐殺動物嘅案件，結果法庭都判得好輕。動物權益同民主當然有關係，因為民主政府先至會聽人民嘅聲音，𠵱家特首係中央挑選嘅，如果佢係由香港人選出嚟，我哋發出嘅聲音，佢就要聽。」
我要一份工唔要綜援
馬平城 牛池灣街市雞販
「今日全場得我一個雞販出嚟，個仔今日叫我去游水，但我唔去。我賣咗20年雞，業界俾政府折磨咗10年，不斷抹黑，但我哋業界冇人因為禽流感而死。業界有啲人要錢，無可厚非，但日日清，生意少好多。政府因為奧運要抹煞我哋，但我會堅持，只要有活雞賣，我會賣到最後一分鐘，我要一份工，唔要綜援。我要養家，政府應該畀我哋安居樂業，但做唔到。」
