蘇志威（阿細）同劉小慧結婚11年，過咗7年之癢好耐，佢哋仲有兩個小寶寶，點知最近有周刊寫佢兩公婆婚姻現危機，話因為阿細脾氣暴躁兼唔黐家，搞到小慧帶埋兩個女搬離飛鵝山屋企，返咗去娘家住，阿細仲未見過影蹤。
「真係超搞笑」
馮仁昭噚日打電話問小慧，佢話：「真係超搞笑，本周刊話我同爸爸嘆茶，我爸爸死咗好耐，嗰個係我阿哥，我哋一家返咗娘家住，因為屋企裝修，老公去咗多倫多登台，佢今日返嚟，𠵱家咪去接機囉，不過篇報道已經寫得我好，起碼唔係話我紅杏出牆，又冇情慾對話。」
噚日下晝4點幾，啱啱喺多倫多返港嘅阿細，一落機就同9歲大女君蕎一齊返太太娘家。阿細揸住七人車到場，離遠見有記者隨即戴墨鏡兼報以微笑，但就冇停車接受訪問。大女就喺車廂後座縮成蝦米大覺瞓，不過阿細冇為囡囡綁安全帶就未免有欠安全，而全程小慧就未見露面。
「唔係我住邊」
之後阿細話：「我啱啱落機，鬼咁攰，點知即刻聽到咁嘅消息，我親口講一次真係冇咁嘅事，啲咁嘅炒作新聞，我都唔知講乜好，全部都係屈我嘅。」馮仁昭又問佢係咪一家人住喺小慧娘家，阿細話：「梗係，唔係我住邊呀！」