早排相繼有多個香港人被澳門拒絕入境，包括港大女生陳巧文，引起澳門立法會議員區錦新嘅關注。佢向澳門保安司提出質詢，問澳門政府係咪有份拒絕入境嘅港人黑名單，以及制訂名單嘅準則係乜。點知澳門保安司回覆佢話，當局冇拒絕入境港人黑名單。
對於當局嘅回應，區錦新當然唔收貨，因為呢個月中有個持歐盟護照嘅荷蘭公民由香港坐船去澳門，喺港澳碼頭被拒入境，向佢求助，當時移民局兩名值日官就親口證實，呢位先生因為喺拒絕入境嘅名單上，佢哋都係依法辦事。區錦新話，咁即係有黑名單啦，佢大鬧澳門特區政府黑箱作業，隨意限制外來人士入境，令澳門旅遊業同會展業發展蒙上陰影，嚴重傷害澳門形象。