家陣買樓實用面積六成幾都唔係未見過，通常得七成、八成已經令人覺得好難得，網友路過提起舊樓好多時都有九成，佢喺香港討論區問：「有冇人住完低實用新樓，𠵱家住番高實用舊樓呢？」又問「發展商會唔會起番高實用新樓做賣點呢？六星級會所對我冇吸引力。」
對發展商嘅要求，網友姚本輝覺得冇會所就冇市場，「好多新一代用家已經被教育到會所係必需品，冇就係cheap。第二、冇會所發展商點個個月收每呎兩個幾管理費？呢啲係最穩定嘅收入。」happy_lady指佢住緊嘅普通大型屋苑都有會所，管理費只係每呎$1.2至$1.5，唔算貴。
bestapple就話，「只要係保值嘅，唔介意畀多啲錢要個會所同view。」