上星期一本欄講委屈民生書院，內裏談及英語發音，引述浸會大學一位南亞裔訪問教授之言，大意係指英語發音有地方口音，係一個人之文化認同，不必強求與BBC音或CNN音一致。事實上，英國人講英文，美國人講英文，地區性口音亦都好多，搵年青時費格遜爵士與羅倫士奧利花爵士（已故）坐埋一齊，請佢兩位討論足球或賽馬，我哋一定認為羅倫士奧利花講英語漂亮到極，容易聽，費格遜講緊鄉下話，唔知佢講乜。但你估費格遜會唔會因此而自卑，覺得矮人一截呢？當然唔會啦。英國人如要進入國會或做舞台演員，就會努力擺脫鄉下口音，否則唔會理得咁多。中國就素來係勝者為王，孫中山、毛澤東、蔣介石、林彪、鄧小平等人，幾時有認真學好京片子？佢哋講國語嘅廣東音、湖南音、江浙音、四川音，你估全中國人民都聽得明咩。
左丁山並唔係話學好標準英語音唔重要，如有時間，或留學英美，都係應該盡量努力學習嘅，純正英語，的確係好聽好多。一位讀者E來英文電郵駁斥，佢認為講到好似nativespeakers咁嘅英文，會被認為高人一等，佢努力聽BBC電台與BBC影碟，學習標準音，結果被老闆讚賞，同事表揚，於是做人做事都增加信心，見客做presentation都醒目啲，所以佢反對英語發音帶本地口音。
讀者E之言，大概反映唔少本地教師，僱主及教育局官員之想法。殊不知我哋香港五十年來都係用中文教英文書為教學主流，讀書成績唔曳，去外國進入名校者亦不少數，發音就差啲！近十年來政府堅持用中文教中文書，英語教英文書，咁就死晒火，人人都話香港學生中英文退晒步，標準發音更談不上！
荷蘭人、法國人、德國人、意大利人坐埋一齊開會，你估佢哋用乜共同語言溝通呢？幾乎肯定係用英語，而且唔係標準英語。前星期香港大學有一個國際學術會議講英語之環球角色，與會之教授、專家，多數同意ELF（Englishasalinguafranca）愈來愈重要，講英語，寫英文，旨在溝通，未必須要一定與英國人嘅英語相同，此乃世界趨勢也。