喺剛過去嘅周末，天氣雖陰晴不定兼時下大雨，但一班嚟自香港同國內嘅林寶堅尼（Lamborghini）跑車車主卻一於少理，浩浩蕩蕩咁拉隊嚟到珠海國際賽車場，目的當然係一展自己駕馭「狂牛」嘅身手，於是一場激烈嘅「鬥牛比賽」就喺滂沱大雨下展開！
記者：丹利
攝影：林軍
鳴謝：LamborghiniHK（29006666）
大雨無損心情
因大雨關係，活動首日（上周六）到珠海國際賽車場出席今次TrackDay嘅Lamborghini跑車，加埋廠方特別安排嘅全新MurcielagoLP640同GallardoLP560-4都只係得10部，但仍無損一班車主嘅心情，繼續揸住愛驅喺盡濕嘅賽道上快跑，有人更特別打電話畀班報咗名嘅朋友，叫佢哋快啲嚟玩㖭！車主們喺落場前，先要聽聽兩位廠方導師MassimilianoVenturi同GiorgioBonisoli介紹賽道唔同路段嘅情況，隨後再要跟佢哋喺賽道上試跑，熟習後先可以快跑。正如先前咁講，首日活動舉行期間經常落大雨，但呢班「鬥牛勇士」卻一於少理，決定喺盡濕嘅賽道上飛馳，感受一下「雨中鬥牛」嘅快感。
驚險場面盡出
可能因為路濕同未熟習賽道嘅關係，唔少「鬥牛勇士」喺早上嘅FreeRun環節入面都唔敢快跑，反而喺下午一節卻嚟得勢兇夾狼，在旁觀看嘅Fans同進行拍攝工作嘅傳媒，都大聲吶喊，好似喺賽車場上欣賞真正嘅比賽一樣精采。不過，話就話已經熟習咗賽道，但滂沱大雨令路面盡濕，形成咗唔少水氹，只要車手稍有差遲，就會有驚險鏡頭出現，當中除咗快跑嘅「大牛」Murcielago，喺衝過水氹時左搖右擺外，一部屬輕量版嘅「細牛」GallardoSuperleggera，更因為LateBrake而險些喺4號彎位衝出沙池㖭！
至於全日活動中最精采嘅節目，就係車主同傳媒們能一坐由MassimilianoVenturi駕駛嘅MurcielagoLP640，同埋由GiorgioBonisoli掌舵嘅GallardoLP560-4喺賽道上快跑，好讓大家能感受一下佢哋嘅出眾技術，亦可體驗到配備咗大馬力引擎同四驅系統嘅Lamborghini跑車，喺賽道上嘅過人之處！
「鬥牛」以外……
喺今次TrackDay活動入面，除可睇到「大牛」同「細牛」喺賽道上快跑嘅雄姿外，仲有靚靚賽車女郎、型男幫美女戴頭盔等等嘅精采場面，係咪夠晒豐富呢？
