日前揸車經過觀塘繞道，發覺遠處有部的士車尾好得意，所以就叫身旁嘅同事快手拎部相機出嚟，換埋支長鏡影番幾張相，睇吓部的士究竟係咩料。返到公司睇番啲相，先見到部的士嘅右邊車尾原來俾人撞到歪晒，連尾燈都無埋。更勁嘅係連尾冚都撞歪埋，閂唔到之餘，左邊仲幾乎有車頂咁高。
睇嚟呢位司機大佬都幾慘情，做唔到生意之餘，仲要拎一大筆錢出嚟整車。不過諗深一層，佢咁樣揸住部車喺路面上行走，即使佢有用繩綁緊尾冚喺泵把上，但始終單靠一條繩嘅力量又點夠呢？點都要加多兩條，並以較慢嘅車速行車。不過我始終認為，最穩陣都係叫拖車拖走，咁先至對自己同其他道路使用者都有更多保障嘛！
記者：丹尼斯