八方早前寫過，直選新界西嘅工聯會王國興，擬搵葵青區議會副主席麥美娟Alice做樁腳，誰不知樁腳自己都失足，早前不幸跌斷腳。由於傷勢唔輕，康復需時兼有一段時間要以輪椅代步，能否參選變數極大，不過王國興同八方講，佢係專一嘅男人，既然已揀咗Alice，就唔會變心，一心一意繼續請Alice做樁腳，唔會因為佢行動不便而換人。
政治好現實，患難見真情好罕見，王國興又話，唔單止唔介意Alice行動不便，甚至願意幫佢推輪椅一齊派單張。八方唔知王國興講真定講笑，坐輪椅參選呢個噱頭有乜效果，選完先知。至於苦主Alice已經出院回家休養。