英國《金融時報》最近公佈08年全球市值500強企業排行榜，名列榜首係美國埃克森美孚，以4525億（美金．下同）穩居冠軍，第二位嘅係中石油（857），擊敗美國通用電氣，以4240億市值贏得榜眼，較第三位通用電氣3696億市值，高出544億，為中國企業爭光。
中石油喺海外揚威，董事長蔣潔敏就話開心啫，但對散戶嚟講就冇乜實際幫助，因為中石油股價由舊年19.9蚊高位急跌，至今累跌近五成，唔少高位入貨嘅散戶都喊得一句句。
油公司排名取代銀行
講番全球500強排名榜，係以今年3月31號嘅股價作計算基礎，今年個榜有兩個特點，一係油公司取代銀行，打入前列位置，二係越嚟越多新興市場國家嘅企業，包括中國、俄羅斯同印度公司入榜。
今年共有25家中國企業上榜，比舊年得8家急增兩倍。當中唔少國企排名高咗，例如中石化（386）由53位升上37，中移動（941）由16位升至第5，聯通（762）首次入圍，位列337。