有廣告標榜養大一個孩子至少要4百萬，育有兩子一女的郭錦恩（Crystal）豈非至少要花1千2百萬？郭錦恩認為養大一個孩子不止付出金錢，更要無限愛心和時間。處身在重視物質、鼓勵消費的香港，Crystal會自創多元化的親子節目，帶子女行山釣魚親親大自然；在家中則就地取材以電筒照射扮Disco；平日逛街市，在魚檔買魚讓仔女學解剖等，從生活中找趣味教育，開銷不大，加強小朋友創意之餘，更可訓練他們思想獨立。 撰文：顏英儀
郭錦恩99年與美籍丈夫Richard結婚後組織家庭，育有兩子一女，分別是7歲的大仔Wolf，4歲半的二女Red和3歲的細仔Kiva，一家五口非常幸福，羨煞旁人。雖然Crystal是郭氏家族（曾祖父是上海四大百貨業永安的創辦人之一）一分子，不過她照顧子女從不假手於人，單是從她的電話留言信箱就可略知一二：「I'maverybusymama,leavemeamessage.」不過她卻自得其樂，非常享受忙碌的樂趣。
兩父子齊學滑浪
Crystal每日都會親自接送子女返學，她日前接受訪問時說：「朋友都叫我不如請司機，就唔使咁辛苦喇，但係我唔鍾意，我淨係湊佢哋返學放學，就已經令我好忙，不過我非常樂意做仔女嘅司機，執屋、洗碗就由工人負責。」
每一個周日都是Crystal的家庭日，她最喜歡帶仔女親親大自然，Crystal說：「一家人最喜歡滑浪、釣魚、行山等戶外活動，我會避開行商場同shopping，去shoppingmall只係消費嘅活動，而且我好怕喺侷促嘅環境入面，最近就經常一家人去沙灘玩，上年開始大仔Wolf愛上滑浪，𠵱家老公40幾歲人先開始同個仔一齊學，想同個仔catchup，令小朋友同父母零隔膜，所有活動盡量圍繞住小朋友嘅興趣同方向，而我都係最近先接觸呢種運動咋！」
整餅練靈活手感
除了帶子女親親大自然之外，Crystal也會帶他們到街市買餸，讓他們學到很多生活知識，她笑說：「Wolf性格比較活躍，最鍾意同我行街市，見到魚檔啲魚又會觀察入微，試過叫我買一條魷魚畀佢，然後返屋企研究自己點樣去解剖，我咪當呢個係佢嘅興趣，玩半日只不過係20蚊，中國人嘅媽咪一定會嫌污糟，但過程中佢可以學到書本學唔到嘅知識，魚檔啲人都知我個仔鍾意研究魚類，成日都會送魚畀佢玩，可能Wolf同我一樣鍾意研究血淋淋嘅嘢。」
Crystal覺得高昂學費和課外活動的支出是在所難免，因此惟有在其他消費方面減省開支，街市就成為她shopping的好去處。
Crystal不想子女過於物質主義，除不買名牌外，又會在家搞不同活動，她說：「我覺得香港人太過物質主義，其實一家人可以喺屋企整意大利粉同曲奇餅，希望子女透過製作過程產生滿足感，整完之後又可以食，一舉兩得，而且透過整餅、整麵等活動可以畀小朋友有touching（觸摸）嘅感覺，刺激小朋友學習能力，我比較喜歡用creative嘅方法教育下一代，又慳錢，其實做家長唔應該講太多理論，我發覺香港教育非常缺乏創作力，加上讀書壓力又大，變咗冇時間思考，應該畀小朋友多啲空間去發展思維，提高分析能力。」
屋企搖身變Disco
平日Crystal都會給予很多私人時間讓子女在家中自由發揮，她說：「有時食完晚飯之後，Wolf同Red會播hiphop音樂，又或者Madonna嘅歌，然後熄晒客廳啲燈，自己dressup晒，拎住電筒照嚟照去扮喺disco入面，又跳舞又唱歌，好有氣氛，老公見到都會join埋一份，我覺得家長應該畀仔女自己發揮，一齊分享，因為親子時間唔可以用錢買返嚟，一家人溝通最緊要。」Crystal也會同子女一起在家搞破壞，將廚房的煲及碟當作樂器，與子女在家中夾band，但就不花分文，認真知慳識儉。
全家演戲教普通話
除了家庭之外，Crystal與友人合資推出學習雙語DVD教材《CultureCubs》（小龍與小克），以學習普通話和英文為主，由美國籍的玩具小熊「小克」及中國籍的功夫熊貓「小龍」擔任主角。
Crystal除是製作人外，在DVD中，也擔任導演和演員，更全家總動員齊齊拍攝，Crystal三個活寶貝扮鬼扮馬，又扮美人魚、獅子等，連她的老公都有份演出，一家五口非常齊心。
街市尋寶滿載而歸
一般人會嫌街市是污穢的地方，但Crystal就經常帶同三位子女到灣仔街市買餸，訪問當日，由於大仔Wolf要上課，所以她只帶Red和Kiva出動，當到達街市時，Crystal就忙得團團轉，3歲的Kiva一到街市，即被玩具檔的玩具吸引，Crystal隨即買下一盒價值20元的飛機模型給他，之後又一支箭走到另一間店舖看他喜歡的幪面超人，不過就沒有扭計要再買。
三母子其後又到專賣派對服飾的檔口，Crystal花了80元買了一條partydress給比較文靜和喜歡扮靚的二女Red，十分超值。另外，又買了史力加的面具給Kiva。
平分鉛筆糖
及後他們經過糖果店時，Crystal就買了健康的果仁給子女當零食，老闆見到一對可愛的小寶貝，即請他們吃糖。肚餓的Kiva突然想吃紅蘿蔔，Crystal又走到菜檔買了有機紅蘿蔔給他醫肚，還立刻叫檔主洗亁淨，Kiva隨即咬了幾口。當日最後一站是糖果檔，Crystal買了價值10元的鉛筆糖給他們對分，絕不偏心，而全程Red與Kiva都表現得十分乖巧。Crystal表示會爭取每一個機會教育仔女，就連付錢都要他們親力親為，以訓練他們獨立的性格。
育兒心得：給孩子私人空間減壓
香港物價騰貴，養育一個孩子殊不簡單，除了基本的衣食住行外，教育方面，父母往往會花上大量金錢培育子女成才，育有三子女的Crystal的擔子可不輕，她對此說：「真係好貴，除了交學費之外，仲有課外活動，起初生第一胎嘅時候，以為可以自己喺屋企教，唔使出去報名學，但大仔長大後覺得有需要畀佢出去學嘢，好似學彈琴、踢波、游水、畫畫、普通話、功夫等。之後再生多兩個，所有開支都要乘三，不過暫時都未畀細仔Kiva學住。」
每日Crystal都會將子女上學和課外活動的時間記下來，雖然課外活動時間表每周都安排得很密，但都會有足夠的私人時間給三個兒女，Crystal說：「忙得來我都會畀freetime佢哋，一個星期會有一日，佢哋放學之後有自己嘅時間，返學日日有壓力，又要應付功課、考試，作為家長應該要畀啲空間同時間佢哋唞吓。」
學費年逾十萬
本地教育制度比較大壓力，故Crystal會送仔女入讀國際學校，雖然一年學費動輒十多萬，但她說：「因為覺得返本地學校會太過辛苦，加上老公係外國人，我覺得有呢個需要，不過學費就貴得好誇張，我真係戥我老公辛苦！另外，我又想仔女學好兩文三語，喺屋企我跟佢哋講廣東話，老公講英文，而我又希望仔女將來可以講到流利普通話，語言最好從細學起，我專登幫仔女報咗以普通話教授嘅繪畫班、數學班，感覺冇咁嚴肅，希望透過興趣令佢哋會學得好啲，一舉兩得。」
