酒店相信係繙譯名詞。英文hotel在民國年代一直譯作飯店，如北京飯店、上海和平飯店、國際飯店、台北希爾頓飯店、圓山大飯店。左丁山以為飯店或酒店其實都唔準確，英文hotel應該係中國古代之客棧，內有房間、有飯廳（現稱餐廳），是可住宿、有酒飲、有飯食嘅地方。以中文嚟講，普通投宿地方叫做客棧，高級啲嘅，叫做賓館（如廣州東方賓館、北京釣魚台賓館），飯店就係食飯飲酒之地方，字面上無住宿嘅涵義。民國時期，繙譯高手如雲，國文底子深厚，寫文章好過我哋多多聲，例如蔣彝譯「可口可樂」，可稱千古絕唱，但點解當年會用飯店或酒店嚟繙譯hotel呢？望有識者有以教我！
香港仲麻煩，英文驅逐中文，酒店係高級啲嘅！賓館就係指大廈內之廉價客棧，好容易令內地人混淆不清。與酒店M講起，佢都頭擰擰，因為香港好多所謂酒店其實係客棧或者賓館，外地遊客不察，上網訂房，中咗招都唔知。
今年係奧運年，是否亦係酒店好景年呢？酒店M話：「期望愈高，失望愈大。香港未見到奧運利益，北京啲酒店亦叫苦，這星期北京酒店房租大跌價，遲啲訂房更着數。」何故如此，酒店M話與北京反恐、反藏獨及四川地震有關，就好似主人家開盛大派對，但嚴防賓客入場一樣，結果賓客咪索性唔到場囉。佢叫左丁山睇吓六月二十三日之IHT，頭版有篇報導講北京KerryCentreHotel以往在六月尾住滿外來遊客，酒店內之酒吧Centro塞滿人。但今年六月十九日，Centro內人客有數得計，是日酒店入住率只有63%，而去年同期係100%。啲遊客點解唔見咗？記者話與中國批准外人入境從嚴，外國商人攞唔到MultipleVisa有關，導致不少夏季旅行團（入境團）取消，到奧運正式開幕之時，北京啲酒店會面對空房、空枱、空巴士嘅尷尬情況。京奧本是大生意，臨近開幕變成反高潮，因奧運概念而趕住建築趕住開幕嘅酒店就最杰，奧運之後，借錢畀新酒店嘅銀行怕要開展債務重組咯！