「明代宮廷藝術展覽」（PowerandGlory：CourtArtsofChina'sMingDynasty）喺全美最多亞洲人聚居嘅三藩巿舉行，展覽喺當地時間周五早上開幕，八方同事躬逢其會，見到幾多熱愛東方藝術嘅人慕名而至。
中國畫有疑似高球棍
Joseph同Bobby一把年紀，喺展館內望住幅明代仕女圖眼都唔眨，原來佢哋係30年波齡嘅高爾夫球波友，除咗打波，兩人另一共同興趣係中國藝術，佢哋對幅《仕女圖卷》咁有興趣，係因為發現呢幅十六世紀中國畫，畫中仕女竟然拎住支疑似高球棍。
Joseph指出，畫中女子仲帶埋球袋，有「球僮」服侍，同蘇格蘭十八世紀出現最早期高球形式甚為相似，佢更笑言呢幅畫，可能係證明中國係高球發源地嘅鐵證，值得深入研究。