一個雨濕路滑嘅下午，一架離奇失靈嘅旅遊巴士，一座壁壘森嚴嘅政府大樓，串連咗一宗車毀人亡嘅慘劇。花園道車禍衝擊特區政治神經中樞，意外嘅嘢大家都唔想，不過一方有難，八方支援；城中八卦公八卦婆緊守崗位，第一時間總結經驗，向煲呔為首嘅特區班子傾授機宜，八方在此轉述幾句，唔知篤信風水玄學嘅煲呔聽唔聽得入耳。
大體上，堪輿學家都認為，大大架巴士失靈撞向政府總部，係對管治班子嘅一種預警。周達明師傅話，根據《易經》學說，天有一象，地有一物，任何異乎尋常嘅事情發生，都係對人間嘅示警。今次無端端有架車撞向政府辦公大樓，喺嗰度返工嘅人員，無論對健康或者運氣，都唔係好事。
大樓「路冲」位煞氣重
失事巴士撞正中區政府合署東座，根據另一位師傅吳佩孚分析，嗰度好衰唔衰「得」正喺花園道同下亞厘畢道之間嘅丁字路交界，即係風水學嘅上「路冲」位，成座建築物都承受住煞氣。撞親幅牆事小，但係總部東宮嘅幾個局唔慌有運行。
被吳師傅批正嘅幾個局包括李少光嘅保安局、張建宗嘅勞工及福利局、鄭汝樺嘅運輸及房屋局、同埋林瑞麟嘅政制及內地事務局。今年內，呢幾個局唔單止會行政失誤，局長嘅民望仲會下跌，總之煩到不得了。
麥玲玲師傅都係咁講，原來今年二黑星喺亁位，預示帝王將相諸事不吉；巴士衝擊政府總部固然係一個例證，肥局長馬時亨因為健康問題下台都係出於天意。所以煲呔今年仲有排捱，噩運會陸續有來，民望會陸續下挫。若然唔想咁樣衰落去，就要聽多啲民意。
通勝有講，農曆五月係破月，吳佩孚話，呢個月係統治嘅凶險月份，無論貴州百姓圍攻公安局政府大樓，或者巴士失靈撞向政府總部，都係一種禍兆。既然煲呔份人咁鬼大迷信，入主禮賓府之前都要請個老友兼隱世風水師龍景銓佈局擺陣，不如益吓班手下，搵龍大師再次出山，搞搞東宮個局，保得住班子嘅福壽雙全，自己嘅民望評分都可望止跌回升喇。
mailto:[email protected]