香港人做嘢較為心急，唔少人試過貪方便捐欄杆，但相信唔係好多人會因為捐欄杆而受傷，而且仲係整親下體。但民建聯立法會議員黃容根提醒大家，其實有種欄杆隨時係城市陷阱，喺太和邨對出巴士站嘅欄杆就係呢種致命兇器。
接投訴後親自試捐
據知政府喺年幾兩年前因應太多人喺「空框框」嘅傳統欄杆上勾單車，搞到市容唔多整潔，就換咗一批奇形怪狀嘅新欄杆；換咗之後係就係冇咗違例泊單車嘅問題，但就有好多市民因為捐呢種欄杆而傷及下體，並且向黃容根投訴。
根叔話，幾個受害者有男有女，年齡就唔方便講喇。佢收到投訴之後，都以身犯險，親自專程去現場試捐咗一次。由於佢早有準備，所以身體冇乜損傷，但佢話完全體驗到捐呢種欄杆嘅危險程度；為免更多市民受害，佢已經叫咗政府換新欄杆；喺未有新欄杆之前，惟有喺欄杆附近掛張橫額出嚟，提醒大家唔好亂捐，否則後果可大可小。