副局長政治助理風波，估唔到搞咗咁耐。左丁山幾同情一班政治新人，尤其是那一位二十八歲年青人。整件事可議之處，就係名單宣佈前之鋪排，如果事先有啲公關諗頭（譬如自動引爆國籍問題），就唔會「出閘脫腳」，之後一路被迫玩damagecontrol，陷於被動。
不講公關，講吓實質。第一，薪水算唔算太高？以商界薪水比較，唔算高，與學校教師或政務官薪水計，算高；如老波骨王永平所言，薪酬之制定乃得到立法會批准，議員脫不了責任，唔可以完全怪晒政府。薪酬是否過高，係相對的。同樣在大學畢業，出嚟做記者，月薪一定少過做銀行見習主任，而薪酬之分別，與讀書成績無關。罵副局長、政治助理薪酬過高，只係為罵，說服力不大。
第二，與政治新人具備同樣學歷，相同年紀之香港人，十之七八曾有移民或留學經驗，或者持有居英權。此乃八九年六四民運之後，香港菁英之歷史遺留問題，肥佬黎與左丁山及鄭大班、袁天凡等等當年曾公開遊行爭取居英權，故此不覺得要鬧人持有外國護照，當然「又食又拎」就礙眼一啲，現在政治新人已表示放棄外籍，可以收貨。
第三，政府用人唯親。呢班人左丁山識得好幾位，知道佢哋全部係叻人，平時與政府關係並不深厚，故此唔相信政府不是用人唯才。政治委任與招聘公務員完全不同，後者一定要考試過關，公開招聘，前者就全部係空降部隊，全世界都一樣。如果特首只任用「自己友」，不計才幹，最終蝕底者就係特首，曾先生點會咁笨。外國之政治任命官員，皆是「總統人馬或總理人馬」，唔通他日奧巴馬會任用共和黨人士，白高敦會信任保守黨精英咩？不過，美國嘅主要政治任命官員要由國會確認通過，先至可以上任（亦因為咁，好多布殊任命官員被民主黨卡住，無法就任），但香港特區主要官員只要中央OK就得。
曾特首史無前例地到立法會為副局長風波作澄清發言，即使你話唔啱聽，亦要佩服佢嘅問責/負責任作風，堪稱勇氣可嘉！