海洋公園早排死咗條中華鱘，但噚日就有喜事一樁可以冲喜吓。朝早11點，海洋公園迎來今年度第500萬個客，不但打破上年度（2006/07）492萬嘅入場人次，仲係連續五年刷新紀錄，而且計落可能贏埋香港廸士尼樂園。因為據講廸士尼今年首兩季人流雖增加15%，但如果全年維持呢個增幅，推算全年客量仍然低於500萬人次。
對於有咁嘅成績，海洋公園主席盛智文梗係高興，佢話今年2月時天氣持續嚴寒，入場人數回落，好彩旅遊業界即時應變，維持酒店收費喺較低水平，令3、4月間訪港旅客大增，正好海洋公園又推出「高清動物月」，入場人次咪再度攀升囉。