主管港澳事務嘅新任國家副主席習近平，前晚喺四川接見香港特首曾蔭權同澳門特首何厚鏵，香港新聞處（GIS）噚日凌晨時分，向傳媒發放幾張會面嘅相片。不過，八方睇相時就赫然發現，個英文圖片說明上，GIS將習近平個姓氏嘅拼音Xi，錯寫成Ji。
雖然話習近平接替前副主席曾慶紅處理香港事務冇耐，香港嘅公務員對新老細可能有啲陌生，但連姓都拼錯埋就確實失禮，話晒香港𠵱家成日強調兩文三語，睇嚟政府都要加強再培訓，提升吓啲同事嘅拼音水平。習近平下星期就會嚟香港訪問三日，實地視察特區奧運馬術比賽嘅籌備情況，煲呔真係要提醒吓GIS，唔好再亂咁幫副主席改姓。