幾年前獲民建聯力薦晉身禮賓府嘅陳克勤，已經辭工回復自由身準備參選，如無意外應該出選新界東。
煲呔開口埋口都話引入副局長、政治助理係要培訓政治人才，陳克勤呢位過來人，對此似乎別有體會，佢噚日出席一個電視台選舉節目時話，就算參選，都唔會特別標榜曾經喺禮賓府工作呢個資歷。
有人形容喺名校畢業，等如履歷表鍍金，曾經做過官，對參選從政應該有優勢，點解陳克勤咁忌諱，甚至想同煲呔劃清界線呢？陳克勤冇解釋，而喺節目上，佢被問到地區事務問題時全部唔識答，公民黨曾國豐答啱一條都贏佢，至於自由黨簡永輝，唔志在選舉輸贏，表現如何，不提也罷。