以前每次測試Mercedes-Benz嘅S-Class，往往只係得三兩小時，兼且做司機多過做乘客，凳都未坐暖就已經要同佢「忍着淚說Goodbye」。日前，終於有機會做長期測試，一口氣做司機又扮老細，不過竟然俾我發現豪嘆有危機——隨時瞓着！
記者：鄭達基
攝影：陳盛臣
模特兒：Brad、Carey
富貴級豪嘆
取車當日，由於自己手頭上嘅工作未能準時完成，惟有將取車時間推遲至黃昏，一時忘記咗嗰日係星期五，而且仲要係下班繁忙時間，灣仔至銅鑼灣一帶道路肯定係「奇塞無比」，心想呢段返公司嘅路程一定好難過。點知咁反而令我有時間慢慢領略呢部S350L有幾嘆。雖然車身長達5,209mm，車頭部份亦較長，但坐在其中都可以好輕鬆咁睇到車頭，而且駕駛席嘅真皮座椅好好坐，即使好似我咁嘅40吋腰肥仔，坐落去都一樣舒舒服服無詐型。
終於嘆到返公司，唔願落車，因為想搵汪若琳幫手試試套音響設備！坐喺後座凉住冷氣聽大眼妹嘅歌Relax吓，我大字形咁坐喺闊落嘅後座，舒服到瞓着咗，唔怪得咁多富豪揀S-Class做座駕啦！不過，都有唔太鍾意嘅地方，就係佢嘅軚盤設計感覺上同豪華氣派唔多夾，有改良空間。
美中不足
想唔到部車咁嘆對我嚟講原來有弊處，就係拍攝當日，兩個模特兒Brad同Carey竟然話唔想落車，問點解就異口同聲答道：「部車咁舒服又有冷氣凉，梗係唔落啦！」真係俾佢哋激死。結果影足兩個多小時，就由公司載佢哋返市區，沿途只用7G-Tronic半自動波箱嘅D檔行車，轉檔感覺順滑，加上隔音功夫做得好，傳入車廂嘅噪音唔多，沿途異常寧靜，因為連最活潑嘅Carey都舒服到瞓着埋。對我呢個駕駛者而言，一台可輸出272匹馬力嘅3.5V6引擎，喺日常行車嚟講可謂夠用有餘，而且喺呢個油價高企嘅日子，仲可以幫你慳到唔少油。硬要雞蛋中找骨頭，大概美中不足嘅係中控台上嘅時鐘Size細咗啲，同埋部車行起上嚟穩定到真係令人好眼瞓囉！
規格
引擎：3,498c.c.V6DOHC
馬力：272hp/6,000rpm
扭力：350Nm/2,400-5,000rpm
傳動：7G-Tronic半自動波，後輪驅動
尺碼：5,209×1,872×1,473mm
軸距：3,165mm
車重：1,925kg
查詢：仁孚行（28957339）