中式白鱔最正煮法係──炸。脆炸白鱔真係超香口，做呢個專題，試咁多間食肆，我未食過半條白鱔骨，啖啖卜卜脆。唔食中式白鱔，你走寶咯。
記者：王震遠
攝影：梁細權、譚盈傑、伍慶泉
瘦身白鱔夠爽口
先搞清一樣嘢，師傅話：「中式鰻魚，用嘅其實係白鱔。」亦老實，夏天唔係白鱔當造期，白鱔年尾當造最肥美，𠵱家食白鱔，勝在Size剛剛好，大熱天時咬入口，唔會啖啖肥油。夏天食鱔食個「爽」字，鱔肉瘦身先夠爽又唔會太腍，入口彈牙越食越滋味。中式白鱔有好多煮法，炸又得燒又得，蒸都無問題，但訪問過咁多個中式食肆師傅，個個都異口同聲話脆炸最好食，都啱嘅，爽完，梗係要脆啦，炸到脆卜卜夠香口，先啱香港人口味嘛。
好味四炸
「逸東酒店」中菜廳「逸東軒」，師傅好心思，脆炸都諗到葱椒爆、椒鹽、沙拉同咕嚕四種做法，總有一種啱你口味。
糖醋咕嚕鰻魚球$88
鰻魚𠝹花落滾油炸兩分鐘，加菠蘿、香葱同青椒炒兩炒上碟，咕嚕汁用白醋、糖同梅子醬調製而成，酸甜開胃。
Calvin：咕嚕汁做得幾好，酸甜味道剛剛好。
椒鹽鰻魚$85
鰻魚切薄片，撲生粉再落鑊炸到亁身，只加少少鹽調味。入口，脆到有聲出，原來簡單就是好，單單用鹽，已經吊出白鱔鮮味。
Kelly：不嬲鍾意食椒鹽，送飯Fit晒啦。
沙拉鰻魚$88
鰻魚起骨切到一塊塊骨牌咁靚，脆炸完加沙拉醬兜一兜上碟。沙拉醬味夠濃，鰻魚脆身，夾起唔會散收收。
Tiffany：味道好似沙拉骨，換咗鰻魚好特別。
京葱三椒爆鰻魚$98
京葱加燈籠椒落鑊炒，鰻魚起骨切到靚一靚，落滾油炸到脆。入口，葱香帶少辣，好食過京葱爆牛肉。
Sonia：京葱好香，鰻魚好脆口，唔覺有骨。
佐敦彌敦道380號逸東酒店B2/27101093
新鮮配搭
見牆身貼滿明星合照，就知「三姐海鮮飯店」喺飲食界幾出名，星期六、日晚飯時間絕對座無虛席，又難怪佢咁旺場，一碟南乳鰻魚，真係超好味。
南乳鰻魚$88
南乳×鰻魚？感覺怪怪哋呀呵？但試過包你話正。油炸鰻魚超鬆脆，每一啖都食到南乳香，點埋個南乳醬汁，連送三碗大飯都得呀。
張先生：南乳汁同鰻魚幾夾。
將軍澳田下灣村34號地下/27013136
飯粒亁身
「小菜王」個朵，喺大牌檔響噹噹，舖位越開越多，食客越食越捧場，師傅拋鑊功架十足，真係睇得開心食得稱心呀。
鰻魚炒飯$68
師傅每日揀條靚鰻魚，連配料加日本燒汁勁炒走油，飯粒夠亁身，用手指頭咁大嘅蝦做配料，認真賣大包，炒香爽口彈牙，香噴噴到離九條街都聞到。
深水埗福榮街43號地舖/27768380
入口無骨
「魚翅大排檔」，聽個名以為真係街邊大牌檔，其實係間裝修優雅嘅中菜館，門口擺兩塊鎮店之寶大魚翅，做鮑參翅肚出色，做中式鰻魚一樣掂。
菜盤蜜餞鰻魚球$68
新鮮游水大白鱔去骨，加配料打成球狀，落鑊泡兩泡再搽蜜糖，用生菜包住食，一啖一個好香甜，好有嚼勁。
馮先生：入口無骨，皮好脆，咬落Feel到有汁。
旺角彌敦道601號創興廣場1樓117-121號舖/23952000