自問偏好高身四驅車，鍾意腰線高視野夠廣，有種高瞻遠矚嘅優越感，ToyotaRAV4自然符合晒呢啲要求，新一代造型較以往斯文，又不失RV嘅玩樂特色，潮男美女都Carry得起。今勻搵佢嚟做長期測試，要佢充當跑腿之餘，仲捱義氣陪我做保母，齊齊俾幾隻生番蹂躪，原來揸同坐嗰個都可以玩得好開心！
記者：梁美甜
攝影：周旭民、伍慶泉
特別演出：陸嘉俊、陸嘉寶、陸嘉瑤
型女SuperMatch
好多人都覺得四驅車只有男人至駕馭得到，呢個諗法甚至連女人都有，事關過往四驅車外形大而笨重，線條粗獷，與嬌滴滴嘅女孩子總係有點格格不入，就算紅極一時嘅RAV4都係。不過新一代RAV4已經脫胎換骨，外形唔再死板，線條分明，大頭燈尾燈、剛中帶柔嘅圓形霧燈、加大咗嘅鬼面罩及輪拱，就連車尾後備輪胎冚都型咗，整體變得剛柔並重，斯文中見成熟，加上內裝豪華，全時四驅系統配2.0公升VVT-i引擎令操控有力兼容易，我自問唔算嬌滴滴，型女同RAV4就肯定係SuperMatch，點可以唔親身體驗一下。
試駕當日正值雷雨，RAV4絕對發揮到佢嘅優點，尤其係佢套全時間四驅系統，大雨中由灣仔穿梭車陣再跑上高速回東九至環保大道。嘩，眼前出現泥頭車陣，部部似足巨無霸。呢個時候RAV4車身高嘅優點發揮晒出嚟，視線開揚令行車更有把握，至正係轉彎切線順暢而穩定，反應敏捷，惟起步及加速反應稍慢。突然電話響，望一望原來係姨甥仔，嚷着學校假期要寄宿婆婆處，即我嘅屋企啦！
2蚊一公里
由將軍澳出發，雨勢比先前細咗好多，但路上依然水氹陷阱多到暈，咁嘅環境仲唔係畀RAV4大顯身手嘅好機會？左閃右避鬼咁High。跑上高速入東涌，山長水遠接對孖仔同佢哋細妹。三隻馬騮一見部車就即刻摷勻前後左右，大孖仲話車頭好型似足越野賽車；話咁快免匙系統都俾大細孖發現，佢哋就梗係又出又入研究一輪啦！細孖話不如遊吓車河先、細妹一時又話要上廁所，唔係嘛？今晚仲要出灣仔食晚飯喎……總之呢一程認真遙遠，仲不時狂風暴雨，多得呢架RAV4令我一直保持行車穩定，三人仲拍晒手掌，今次型女形象仲唔入晒肉？
不過，耗油量比我想像中高，平均約$2/km；咁又係嘅，RAV4車身重又係四驅，加上油價高企，計落差唔多啦！
規格
引擎：1,998c.c.直4DOHC
馬力：152ps/6,000rpm
扭力：19.8kgm/4,000rpm
傳動：4前速自動波，四驅
尺碼：4,395×1,815×1,720mm
軸距：2,560mm
查詢：皇冠汽車（28661020）