微軟精神領袖蓋茨，上個禮拜正式退任，咁蹺內地電腦業巨頭之一聯想集團（992）精神領袖柳傳志，亦被傳將會辭去母公司聯想控股總裁一職，雖然聯想即刻否認，但都遏止唔到大家嘅聯想。
內地報章《華夏時報》報道，近期傳出柳傳志將卸任聯想控股總裁，又傳接班人唔係大熱，而係黑馬CuongDo。呢位老外06年底先加入聯想集團，家陣係高級副總裁及策略總監。
《華夏時報》記者搵咗聯想控股新聞負責人桂琳回應，對方明確話：「沒有這回事。」不過，又話柳總話晒64歲，退休好合理，家陣物色接班人都係「正常安排」。
手下五虎 朱立南呼聲高
柳總旗下有五虎，包括聯想集團董事長楊元慶、神州數碼（861）董事長郭為、朱立南、陳國棟及趙令歡，《華夏時報》引述知情者話，「柳傳志的接班人最有可能是朱立南。」朱氏喺分拆聯想集團同神州數碼一役表現突出，被柳總讚係「又一位少帥」，家陣係聯想控股常務副總裁。
知情者仲話，朱氏同楊元慶及郭為私交甚篤，可以平衡兩人嘅關係。之但係點解忽然殺出一隻老外黑馬，就令人難以聯想囉。