就嚟又書展，相信今年又有好多才子才女出書獻世。八方噚日喺立法會見到林偉強，原來佢都學人出書。不過佢本書唔係講自己，而係講佢鄉下坪洲。呢位離島區議會主席係坪洲原居民，阿爺嗰代已經定居坪洲。區議會同香港郊野公園之友會合作，出版咗部《坪洲》，專講呢個小島嘅歷史同名勝。
觸發林偉強出書，係來自一盒火柴。佢今年初返鄉祭祖，見到一位坪洲老鄉仲保留住幾十年前嘅九龍火柴，有感而發，於是發動坪洲鄉事委員會，出錢製作一部坪洲旅遊天書，推動本土經濟咁話。坪洲曾經係名震中外嘅世界火柴生產重地，林偉強記得童年時代，見到好多同學仔課餘都要幫父母黐火柴，不過強哥家境富裕，並未做過黐火柴的男孩。