近排唔少亂食減肥藥出事嘅新聞，唔知係咪啲女生急住喺夏天，要減去贅肉着三點式泳衣同小背心，雖然話亂食藥同嚴厲節食呢類地獄式減肥方法好傷身，但仲有好多人當耳邊風，其實大家有冇諗過食得多、減得多呢個概念，最近就有專家提出，食一個超勁早餐減磅嘅新理論，8個月減近40磅。
8個月減近40磅
美國維珍尼亞州立邦聯大學內分泌專家DanielaJakubowicz提出，𠵱家一直用緊少食多運動嘅減肥原則有缺陷，因為好多人都會忍唔到對食物嘅強烈慾望，特別係甜品而失敗。針對呢個問題，佢建議喺早上身體最需要能量嘅時候，食一個包括牛奶、三安士肉類、芝士、麥片同一小片牛奶朱古力，有成1,240卡路里嘅豐富早餐，午餐同晚餐就食以蔬菜同蛋白質為主嘅簡餐。
研究人員安排咗94個癡肥人士參加研究，一半人食豐富早餐，一半人食低卡早餐，8個月之後前者平均減咗近40磅，後者減得9磅，顯示一早食餐飽，先至係健康嘅飲食習慣。
專家話唔食早餐減肥其實係好錯嘅諗法，因為一早起身大腦需要好多能量先至可以運作，如果唔食早餐補充能量，大腦就會向肌肉攞後備能量，呢個過程唔單止會破壞肌肉組織，對減磅幫助都唔大，大腦仲會響起警號，當你下次再食嘢嘅時候，就會自動儲多啲能量，即係儲多咗脂肪留番下次唔夠食嘅時候用，所以可能越減越多脂肪，得不償失。
blog主：醫神