今個星期初鬧片荒！望吓出碟Schedule，完全冇料到，心諗今個星期隨時要停版！點知無限驚喜星期五，爆出隻《三國之見龍卸甲》，劉華加《三國》古戰大場面，已經相當有叫座保證；再配埋靚聲畫DDEX+dtsES，行D9、平均Bitrate仲去到近爆燈7.4MB/s。孖碟裝有專碟睇Making，叫價都係$105。旺角間間碟舖都話賣到嘭嘭聲，過埋今日禮拜個個都話一定要補貨，想買就要快手！
記者、攝影：朱崇德
炸機必玩DDEX
都唔知呢套《三國》係咪同《赤壁》有仇！4月上畫已經飲咗人頭啖湯，𠵱家連DVD都要搶喺7月前見街，贏多個馬鼻。雖然出得急，不過質素就有啲喜出望外！話說記者買碟後俾旺角相熟影音舖Sales攔途截劫搶播，好多街客行過一睇都話畫質勁清，放上40吋LCD畫面完全冇散、冇狗牙，話唔敢相信係DVD！音效方面，dtsES雖然分音細緻，但今次個人較喜歡DDEX，睇戰爭片都係要嘭嘭聲先過癮嘅！
拳腳功夫講古仔
電影主線係講趙子龍（劉德華飾）的傳奇一生，不過電影上畫時為人詬病是與原著相違，例如在百萬軍中救阿斗時，劉華竟然係雜牌義軍中小卒，趙雲竟然有個背己之義兄羅平安（洪金寶飾）。不過本住三分歷史、七分假「演義」模式，如果放得下歷史包袱嚟睇戲，腳本都OK算唔錯。
必睇場位，有初段雨夜劫曹寨、百萬軍中救阿斗，趙子龍單槍戰張飛及關羽等；當中尤以單挑場位最能拍出氣勢！招式、力量，感覺拳拳到肉，實而不華。不過尾段煞科趙雲圍困鳳鳴山一幕，大戰場景有點失分寸，獨欠陣對陣感覺，變成有近、冇遠，不過好彩音效同場面搭夠，都叫做有高潮位。
必睇Bonus：敦煌主景人人食沙
Disc2基本有齊製作特輯、導演/演員訪問及拍攝花絮，近兩個鐘算交足功課。必睇一幕係講述敦煌拍片時常遇大風沙，忽而飄至竟可伸手不見五指，感覺簡直係睇緊國家地理頻道！
三國之見龍卸甲（孖碟
售價：$105
音效：dtsES6.1、DDEX5.1
聲道：國語
DVDPro（23326326）
地址:旺角奶路臣街6E德發商場地庫B4舖