嘩！細細隻，嘩！好得意喎！筆者以為得意少女見到可愛車仔，把聲會自動提高8度，點知，掃興。
人仔細細，陳美詩（Macy）個Ex竟然大大隻––係四驅車HARRIER！「大車型吖嘛！」代價係難泊位，「去親九龍城食飯泊街位，我通常落車俾屋企人泊。」同埋油費貴，「𠵱家油費咁貴，我情願坐的士。」
係咪呀，揀車同拍拖一樣，愛一個上一課。《法政先鋒2》裏面個Formula，更新咗條揀車方程式喇，走開啦大隻佬！你睇我幾得意。
撰文：嘴嚼爺
攝影：伍慶泉
着數=大件？
女人嘅師奶仔算盡性格，我懷疑係天生嘅。「嗰陣考輕型貨車牌，覺得橫掂考就考多樣，好似抵啲咁，你有無睇過啲戲呀？個賊搶咗架車，吓？棍波呀！結果個賊唔識揸俾人捉咗，好好笑㗎嘛，哈！不過，考咗牌之後都無揸過棍波車，都無做過賊。」
考牌要抵，買車要大件，「第一架車係十年車嘅Accord，操車嘛。之後就同屋企人夾錢買咗架HARRIER新車，好闊好大好舒服呀，我又覺得好型。」好快知賴嘢，「油費又貴，細佬又結婚，唔想咁大負擔，賣咗架車情願搭的士。仲有，我好怕塞車，最怕行紅隧，架車咁大攝位難到吖。仲有初初考咗牌，試過行錯對頭線，掉頭睇位好麻煩，後面架大貨車又不停砵我喎……我泊車OK嘅，不過只限停車場，街位我永遠唔識泊，後面又有車等緊你喎，我通常落車俾屋企人泊。」揸車嚟講，大件原來無着數，不過你靚成咁可愛成咁，我第一個撲埋嚟幫你泊位啦。
的骰=實用？
真係睇唔出，陳美詩好眉好貌，都幾鍾意搞爛Gag，「我個牌考咗5年喇，18歲考？又唔係，其實我都四十幾歲架喇……哈哈。」嘩哈哈，咳，唔，經過5年經驗，總結揀車要求，呢架Smartfortwo的的骰骰啱晒你啦，「坐落比想像中闊落，但係車尾肯定無位擺嘢，唔夠實用。」錯喇錯喇，呢架第二代fortwo，車身增長咗195mm，成20cm咁多，主要集中喺車尾，載物量由舊款260升增至340升，而且軟篷唔阻碇，唔會佔用住尾箱空間嘅。
要慳油嘛，呢部車仔平均耗油量4.9L/100km，就算𠵱家油價飛天，計落都係$0.8/km左右，「我其實幾支持一半油一半電嘅車。」環保，叻！「不過如果8毫一公里，呢架又唔錯。」即是淨係環保自己個銀包，都叻！
開篷=天窗？
慳油易泊位都合晒心意，最後一個條件要有天窗喎，fortwo無論開篷版硬頂版都無天窗。「以前架車個大天窗由前去到後，我鍾意個天窗好大個。」這是留戀Ex的表白。開篷點都好過天窗啩？「有海景微風就梗係好。」係，咁落雨點呢？唔想開篷咁揚又點呢？Smartfortwocabrio要全開篷，首先要將個篷開一半，再落車拆走兩邊車門頂條Bar，然後再開篷開到尾。好麻煩呢！但就有開一半嘅好處，無論行緊乜速度，㩒一個掣就可以打開一半篷，同開天窗無分別，落雨咩？㩒個掣又可以閂埋，5秒左右啦。
最後講吓Macy最唔關注嘅性能，「老喇，開始怕死喇！早幾年坐我細佬電單車都無乜嘢，但係上年再坐，轉彎時好驚呀！所以我對車嘅性能真係無乜要求，都唔會快。」新一代fortwo增值到1,000c.c.，唔再係600c.c逢人「恰」車仔，最大馬力84匹，推800kg車重，官方資料顯示0-100km/h加速為10.9秒，算係咁啦，而且加大碼後，車身都唔係好長，掉頭一手軚話咁易。
仲唔買？「𠵱家有做娛樂直播主持，同埋拍緊套古裝劇，放工都好攰，暫時唔會買車喇，怕揸車無精神，惟有搭的士啦。」仲有選擇嘅，識個男朋友車出車入管接送囉，「唔，哎……哈哈……」
規格
引擎：999c.c.直3配Turbo
馬力：84bhp/5,250rpm
扭力：120Nm/3,250rpm
傳動：5前速半自動波，後輪驅動
車重：800kg
查詢：SmartHongKong（34288666）
