立法會噚日討論加強港澳合作嘅動議，查實香港面對澳門嘅發展來勢洶洶，都好有壓力。好似北京奧運仲有一個月多啲就揭幕，全國上下都話weareready，但香港未攞到獎牌，就先輸一仗畀澳門。八方近日同啲駐港外交官員傾開偈，佢哋話呢個月忙到氣咳，因為佢哋國家嘅奧運代表隊不日殺到，不過唔係嚟香港，而係去澳門，佢哋為咗照顧班運動員，仲要移船就磡去到澳門打點一切。
據講，唔少國家嘅奧運健兒去北京參賽前，會先到澳門集訓，主要係為適應時差、氣候呀咁。外交界消息透露，來自英國、葡萄牙、巴西、科威特、阿根廷以及俄羅斯等多國約近800幾位運動員，最快7月底就會登陸澳門，進行最後操練。
港體育場館輸幾班
點解外國精英選擇喺澳門而唔係香港落腳呢？有外交官同八方解謎團，話部份健兒唔直接去北京集訓，係因為擔心北京空氣污染影響作戰狀態；而香港嘅空氣質素又唔好得幾多，所以部份國家寧願到澳門備戰。另一個原因係澳門嘅酒店又新又大，與其畀貴租住香港酒店，不如捨港取澳更着數。
專業運動員刻苦耐勞，酒店質素可能係次要，訓練場地掂唔掂先係首要考慮因素。澳門年前舉行過東亞運動會，興建嘅多個體育場館都符合國際標準，而且場地集中；反觀香港，訓練場地連本地運動員都唔夠用，何況借畀外國？
話分兩頭，有外交官同八方半講笑咁話，澳門雖然配套齊全兼方便集訓，但都有另類風險。尤其是澳門賭場林立，聲色犬馬娛樂乜都有，萬一有運動員集訓完悶悶哋出去輕鬆吓，然後畀班隨團記者或者狗仔隊影到佢哋去「娛樂」，參加olympicgames變成去gambling，就唔係幾好啦。
不過，八方認為有樣嘢澳門仲衰過香港，好似早排佢哋唔畀港大女生陳巧文過境去澳洲咁。噚日立法會討論促進港澳合作嘅動議時，張文光就為陳巧文伸寃，話佢不過係個有己見嘅港大學生，又唔係恐怖分子，澳門政府有乜理由咁驚呀？佢仲順勢插埋特區政府，話政府唔應該對佢嘅求助「石沉大海」，張文英雄救美，可惜未得到政府支援，負責答辯嘅政制及內地事務局局長林瑞麟則貫徹其個人作風，好例牌咁話港澳兩地嘅入境政策互不干預。
mailto:[email protected]