近排，運輸業界不時遊行抗議油價暴升，於是政府決定喺7月9日立法會會議上，提出減免柴油稅嘅動議，相信可暫時舒緩業界經營成本上升嘅問題。
對於今次有關當局嘅迅速反應，實在值得一讚，不過寬減有關稅項嘅最大得益者，究竟係用家定係油公司呢？有油公司接受傳媒查詢時，話會將有關寬減嘅稅項反映於零售價上。不過若根據佢哋嘅加價反應睇嚟，寬減嗰$0.56稅項嘅效果，話咁快又會消失。事關佢哋隨時又大大聲話國際油價上升，兼且新加坡離岸價格上漲，所以一定要加價。咁政府減稅又有乜用呢？轉頭咪又俾每日同你算過度過、務求喺你同我荷包攞多啲錢（查實係搶錢至啱）嘅油公司迫你拎番出嚟，減咗即變無得減，隨時仲要畀多啲，咁減嚟做乜？倒不如政府同民間團體落力監察油公司，唔好成日淨係識得話香港奉行自由經濟，咁樣只會令大家反感！
記者：丹尼斯