暑假又到，又是享受陽光與海灘的好日子。同朋友出海，離不開Wakeboard、香蕉船或水上電單車，年年如是，真是幾好玩都覺得悶。幾位籃球、足球仔，趁球季唞暑期間，一於響應財爺「唐唐」最新口號，「條條fing」走入南丫島，結果就畀幾位試到新奇、好玩又刺激嘅「水上3寶」。記者：李勇明 攝影：區民傑
第1寶：Pumpabike
水上飄全身要用力
Pumpabike可以算係水上電單車與雪橇的混合體，不過就沒有螺旋槳或雪橇狗提供動力，想駕馭Pumpabike於水上飄，唯一方法就是用盡全身體力量，在駕駛座上又un又跳。
推動講求節奏感
負責今次示範的甲一籃球隊愉園大前鋒陳翊麟表示：「要推動這架Pumpabike，其實好講求節奏感，Pumpabike隻翼與水面磨擦時，身體除了要保持平衡，又要連續做出un吓un吓的動作，沒有足夠體能都難以應付。」
Pumpabike的確是3種最新水上活動中最難的，所以西沙水上活動中心同時推出一個Pumpabike課程，兩堂收費$500，每次練習兩小時。
Pumpabike
售價：$6,980
參與人數：1人
難玩度：★★★★★
第2寶：Multisport
3合1風帆浮床帆船三合一
Multisport三合一集風帆、帆船及浮床3種水上活動，帆桿全伸時，你可以好似學「風之后」咁乘風破浪，縮短帆桿又可以坐帆船仔揚帆出海，當然Multisport最簡單玩法，就是收起帆桿變浮床，浮在海中心享受日光浴。
平衡差會跌落水
永倫小前鋒林萬進運動細胞超強，Multisport絕對難不倒他。「其實最難都是企起身一刻，由於船身是吹氣關係，與硬身的纖維板不同，平衡做得差，一不小心就會跌落水。」這名新晉甲一籃球員說。
除三合一系列外，Multisport亦有推出四合一系列，配合一支船槳後，可以將Multisport變身成獨木舟。
Multisport三合一
售價：$3,850
參與人數：1-2人
難玩度：★★★
第3寶：Inflatablejetski
吹氣得意船玩得安全
近年發生多宗快艇或水上電單車撞傷人的意外，樂極生悲；不想慘劇再次發生，這部Inflatablejetski吹氣得意船，安全到可以讓小孩子玩過痛快。首先，Inflatablejetski船身是吹氣而成，就算撞到人都唔覺痛。其次它的引擎由電力發動，最高時速只有9公里，海龜游水應該快過佢。
不懂泳術最啱玩
至於水底的螺旋槳亦有膠殼保護，安全性達100分。不懂泳術的陳文輝與曾錦濤，新球季將加盟傑志足球隊旗下，今次趁放暑假到沙灘玩，Inflatablejetski就啱晒兩人。「架船行得好穩陣，轉彎都唔會跌落水，最啱我哋呢啲唔識游水人士玩。」陳文輝說。
Inflatablejetski
售價：$3,580
參與人數：1-2人
難玩度：★
難玩度：5★為最高
運動員檔案
林萬進 年齡：21歲
效力球會：永倫籃球隊 位置：小前鋒
趙勁皓 年齡：20歲
效力球會：遊協籃球隊（甲二） 位置：小前鋒
陳翊麟 年齡：20歲
效力球會：愉園籃球隊 位置：大前鋒
曾錦濤 年齡：19歲
效力球會：傑志足球隊 位置：前鋒
陳文輝 年齡：20歲
效力球會：傑志足球隊 位置：中場
知多啲：玩得安心又放心
當玩水上活動時，都必須清楚了解自己的能力及身體狀況。切記太飽、太餓、喝酒後、服食藥物後、身體不適及疲勞等，都不適宜參與水上活動。凡參與水上活動者，須穿着泳衣或泳褲，並必須把身上所佩戴之飾物除下，如眼鏡、潛水鏡、戒指、手錶、手鏈、手鐲、頸鏈等硬物。
根據康文署的水上活動安全指引，參與者要掌握基本泳術，能穿着衣服游泳最少50米；並掌握正確求救方法，及留意天氣及海面變化。
模達灣點樣去？
香港仔街渡碼頭乘船，平日費用$9.2，假日收費$13.8，船程大約23分鐘。
西沙水上活動
地址：南丫島模達灣
電話：27928307
網址： http://www.sai-sha.com
同場加映：有得食，有得玩
模達灣內一間甚有地中海風情的餐廳（TheBay），推出水上活動套餐，1小時任玩連飲品小食，平日$120、假日$150。查詢電話29828186。
