被譽為「最美港姐」嘅朱玲玲，自從同「上海姑爺」瑞安集團主席羅康瑞公開戀情後，去到邊都紅粉緋緋。佢噚日出席今年結業嘅小學母校九龍聖德肋撒英文學校歡送活動，雖然橫風橫雨，但依然心情勁靚，更自爆童年曾經考試包尾的秘史。
朱玲玲同校友細訴當年情，佢話自己1965年由緬甸嚟到香港，入讀九龍聖德肋撒英文學校，佢兩個孖生姐姐被安排讀小五，佢因年紀細少少，編配入讀小四，但三姊妹自細形影不離，所以佢扭計要同姐姐一齊上堂，校長心軟，破例畀佢跳班讀小五。
次次考試包尾
雖然扭計成功卻唔好咁得戚，朱玲玲話當年初到貴境，未適應新環境就跳班，學業跟唔上，結果喺聖德肋撒讀咗兩年書，次次考試都包尾，原來「最美港姐」有一段「最尾」往事。雖然成績水皮，不過朱玲玲話喺聖德肋撒讀書嘅時光都好開心，而現年90幾歲嘅鮑校長（Mrs.MariaLourdesBau），令佢印象最深刻，朱玲玲大讚校長為人隨和、友善同充滿智慧。
「上海姑爺」噚日唔見蹤影，另一位闊少、疑似九龍西立法會候選人田北辰就暫做護花使者，全程護住小師妹朱玲玲，望彌撒時好有風度幫佢揭經文，不過教友一齊牽手祈禱時，田二少好機警，冇拖師妹隻手。
田二少58年入聖德肋撒讀小三，但自言細細個已經係學校霸王，學校內唔知幾多枱枱凳凳俾佢整爛晒，有時更會蝦同學仔，推人哋落地，佢惡名遠播，所以操行只係得丙，經常要見家長，後來連校長都買佢怕，竟然求田媽媽帶佢轉校，唔好影響校風。
百厭星細時作惡多端，大咗仍然諸多辯駁，田二少稱讀書時咁曳，都係拜學校功課太多所賜，令佢無心向學，後來轉校去到男拔，嗰邊自由度較大，佢反而變乖，坐定定讀書。
天主教香港教區屬下嘅九龍聖德肋撒英文學校，52年創校，有私立幼稚園及小學，但02年因為校舍唔符合要求而宣佈逐步停辦，今年最後一屆小六同幼稚園學生畢業後就光榮結業，據聞影星關之琳、林海峰同埋音樂人倫永亮都係校友。
mailto:[email protected]