乜嘢叫做無官一身輕，睇肥馬就知。即將離任嘅商務及經濟發展局局長馬時亨噚日做消費權益新聞報道獎頒獎嘉賓，滿場飛好鬼風騷，全場嘉賓同行家爭住同佢合照。佢同八方講，諗住離職後盡情遊埠，去勻英國、美國同北京，話唔定睇埋奧運。佢又計劃行多啲山、打多啲golf收身，但點都唔肯透露𠵱家有幾重。佢近日又收到好多市民提供減肥妙法，託八方多謝大家關心。
八方恭喜得獎行家，包括《蘋果》同事黃賢創同曾顯華，佢哋分別憑〈直銷中心被指陰招欺內地客 富士變富士美借鄧小平胞妹宣傳〉同埋〈萬聖節用品測試七款產品不安全 扮鬼面具藏危機〉奪得新聞攝影組金獎同埋優異獎；白琳、林浚川就憑〈化驗結果半數大腸菌群超標 凍飲冰塊勁含菌易肚屙〉奪特寫組優異獎。