促銷旅遊會籍嘅公司睇準呢排興坐郵輪，舊瓶新酒以免費坐郵輪引人入局。好似網友Mary同小妹呻，上個月男友做咗份電話郵輪嘅問卷調查，之後對方話送四張郵輪船飛，但要上嚟聽講座。男友都知冇咁着數，但plan咗下月坐郵輪，咪上去睇吓。
Mary話嗰晚7點半，佢同男友一齊去嗰間喺尖沙嘴嘅公司，見到坐滿晒人。啲sales叫佢哋寫晒個人資料，連收入都要填，又要關埋手機，Mary心感不妙。啲職員又叫啲客各自坐一枱。啲經理跟住輪流坐落嚟hardsale叫佢哋參加旅遊會籍，「佢哋講到10點幾，有個經理終於出招，叫我哋用幾十萬join佢哋個30年旅行計劃。我梗係唔制，點知佢哋死纏爛打。」
勿被中獎喜訊冲昏
Mary連四張郵輪贈券都唔要想要走，對方死都唔肯，話張郵輪贈券整緊，拖到成半夜12點，「我哋死都唔參加，佢哋先黑口黑面畀贈券我。」Mary話，有贈券都冇用，話要每人畀150蚊，所以決定唔用。
消委會話，舊年接獲呢類嘅旅遊度假計劃投訴都有118宗，建議消費者唔好被「中獎喜訊」冲昏頭腦，千祈唔好喺職員催促下簽約，若被強留可報警求助。
電郵：mailto:[email protected]
逢周六、周日刊出