呢排小妹去麥當勞買包，發現部份店舖有新搞作，就係排隊畀錢買包之後，又要排另一條隊等攞包，大家逼埋一齊等，真係好麻煩，唔似以前即買即攞。小妹都收到唔少朋好同類嘅投訴，網上討論區最近就勁彈麥記制度新不如舊。
好似Strawberry007話，排隊秩序真係好亂，個個湧晒去cashier嗰度等拎餐，舊制佢哋一次過整好多包，放喺架度等員工執畀啲客，賣晒再整。新制係整好晒啲材料，有人買就即刻製作，執一個餐要成幾分鐘。有時啲包又整得求其，啲牛肉亁蒸蒸。
員工批評亂到七彩
麥記員工Jimmy都大吐苦水話，新制原意係希望以最快嘅時間，畀大家享用最新鮮嘅食物，但啲包集中喺一個極狹窄嘅出包位，仲要懶係專門咁分收銀同執單同事，咪亂到七彩囉。收銀就快，但執單員永遠執唔切，睇完張單又要通知廚房，廚房收單先至執餐，搞到啲客好多時要畀完錢又要排隔籬隊等食物，買嘢排兩次隊，好煩囉。所以成日都聽到行新制啲舖頭，被啲客人嘈到暈。
對於咁多麥記fans不滿，麥當勞公關姐姐噚日解釋話，𠵱家部份分店試驗改變廚房制度，用咗即叫即製模式，啲職員收到客人嘅柯打先會做餐，希望提供最快最新鮮嘅包。佢話知道有客人不滿要排兩次隊，會檢討安排。但佢強調，食物水準冇因為廚房制度改變而下降。
電郵：mailto:[email protected]
逢周六、周日刊出