喺金管局做咗14年嘅助理總裁梁鳳儀，早排成為財經事務及庫務局副局長。Julia（梁之洋名）一走，亦牽動金管局新一輪人事任命。
噚日該局公佈，經財爺會同外滙基金諮詢委員會開會後，已經批准咗，由原來該局銀行監理部助理總裁阮國恒，平調接任梁鳳儀出掌外事部助理總裁一職，至於Arthur（阮之洋名）原來職務，就擢升銀行監理處主管萬少焜（洋名Nelson）出任。
內地人脈關係豐厚嘅Julia，係直接策劃及負責本港人民幣業務嘅功臣，不過，據聞Arthur都唔弱，喺金管局任職多年，亦熟悉國內金融事務及參與不少，而且佢素有局內歌王之稱，相信去到邊傾合作事宜，都可以「政通人和」。是次升官嘅Nelson，原來都加入咗金管局14年，最近該局為傳媒搞咗個周末教育工作坊，好少公開露面嘅佢，都有份主講次按問題。